Ծառայություն մատուցողը՝ Փորձագետ (անհատ կամ թիմ)

Աշխատանքի բնույթը՝ Հետազոտություն, ձեռնարկի մշակում, հանդիպումների կազմակերպում և անցկացում

Վայրը՝ ՀՀ մարզեր, Երևան

Ծրագիրը՝ «ՁԳՏՈՒՄ ավելի լավ ապագայի. համայնքների և քաղաքացիական հասարակության դիմակայունություն Հայաստանում» («STRIVE»)

Հաշվետու է՝ «STRIVE» ծրագրի ղեկավարին

Աշխատանքների իրականացման տևողությունը՝ 4 ամիս

Ակնկալվող սկիզբը՝ 2024 թ. օգոստոս

Դիմելու վերջնաժամկետը՝ 2024 թ. հուլիսի 11

1. ԱՌԱՋԱԴՐԱՆՔԻ ՀԻՄՆԱԿԱՆ ՆՊԱՏԱԿԸ

 

1.1. «STRIVE» ծրագրի ընդհանուր նկարագիրը

 

«ՁԳՏՈՒՄ ավելի լավ ապագայի. համայնքների և քաղաքացիական հասարակության դիմակայունություն Հայաստանում» («STRIVE») ծրագիրը, որը համաֆինանսավորվում է Եվրոպական միության կողմից, նպատակ ունի բարելավել Հայաստանի քաղաքացիական հասարակության կազմակերպությունների (ՔՀԿ-ների) դիմակայունությունը, հաշվետվողականությունը և նորարարության կարողությունները: Ծրագիրն աջակցում է ՔՀԿ-ների կազմակերպական կարողությունների բարելավմանը, նպատակային ֆինանսական աջակցության տրամադրմանը, ոչ ֆորմալ խմբերի կողմից սոցիալական ինովացիոն ծրագրերի իրականացմանը, ՔՀԿ-ների միջև ցանցերի և համագործակցության ուժեղացմանը, կամավորության և երիտասարդների առաջնորդության զարգացմանը:

Ծրագրի նպատակներից է խթանել կամավորությունը՝ աջակցելով ՔՀԿ-ներին բարելավել կամավորների ներգրավման պրակտիկան։

 

1.2. Աշխատանքի նկարագիրը

• ՀՀ մարզերում և Երևանում անցկացնել աշխատանքային հանդիպումներ կամավորական խմբերի, ՔՀԿ ներկայացուցիչների, կամավորների հետ աշխատանք իրականացնող կառույցների ներկայացուցիչների հետ՝ կամավորության և քաղաքացիական ներգրավման ներկա իրավիճակը գնահատելու նպատակով։
• Աշխատանքային հանդիպումների ընթացքում դուրս բերված արդյունքների և կատարած հետազոտությունների հիման վրա մշակել կամավորության և քաղաքացիական ներգրավման մասին գործնական ձեռնարկ, որը կիրառելի կլինի ՔՀԿ-ների և կամավորների համար և կտարածվի ազգային, մարզային և տեղական ցանցերով։ Ձեռնարկի բովանդակությունը կարող է ներառել հետևյալը (սակայն չսահմանափակվել դրանով)․

1. Կամավորության և քաղաքացիական ներգրավման կարևորությունը և օգուտները, դրանց տեսակները,
2. Կամավորների հավաքագրման առկա ցանցերը (առցանց և անցանց),
3. Կամավորության առաքելության և նպատակների սահմանման, հմտությունների զարգացման ուղենիշեր,
4. Կամավորների կառավարման և մոտիվացիոն մեխանիզմներ,
5. Կամավոր աշխատանքի, դրա կատարման մոնիթորինգի և օգուտների գնահատման նվազագույն ստանդարտները,
6. Ներառականության և զգայունության մոտեցումները, որոնք ապահովում են տարբեր ունակություններով կամավորների ներգրավումը,
7. Կամավոր աշխատանքի վերաբերյալ ՀՀ օրենքի ամփոփ տեղեկատվություն,
8. Կամավոր աշխատանքին առնչվող պաշտպանության հիմնական մեխանիզմների, ինչպես նաև աշխատանքային հանդիպումների ընթացքում հատկորոշված այլ թեմաների վերաբերյալ ուղղորդումներ,
9. Տարբեր ստուգաթերթեր և հստակ առաջարկներ կամավորների ներգրավման մեխանիզմներ սահմանելու վերաբերյալ,
10. Թեմային առնչվող փաստաթղթերի նմուշներ և օրինակներ,
11. Կամավորների ներգրավման հաջողված պատմություններ/օրինակներ Հայաստանում։

• Կամավոր աշխատաժամանակի հաշվարկման հարթակների ուսումնասիրություն (եթե կան այդպիսիք), նման հարթակի ստեղծման անհրաժեշտության գնահատում։
• («STRIVE») ծրագրի գործընկերների հետ համագործակցությամբ ՀՀ մարզերում և Երևանում կազմակերպել աշխատանքային հանդիպումներ ՔՀԿ-ների հետ՝ աջակցելու վերջիններիս կողմից կամավորների հետ աշխատանքի ռազմավարության մշակմանը: Նախատեսվում է անցկացնել ընդհանուր թվով 12 երկօրյա հանդիպում՝ յուրաքանչյուր հանդիպմանը ներառելով 10-15 ՔՀԿ (25-30 մասնակից)։ Որպես արդյունք ակնկալվում է, որ հանդիպումները կաջակցեն մասնակից ՔՀԿ-ներին մշակել կամավորների ներգրավման ռազմավարություն և վերջինիս իրականացմանն առնչվող ընթացակարգեր/մեխանիզմներ։
• Աշխատանքային հանդիպումներին մասնակցած ՔՀԿ-ների աջակցությամբ անցկացնել կամավորական աշխատանքի մասին տեղեկատվական հանդիպումներ՝ որպես հմտությունների զարգացման գործիք (ընդհանուր թվով՝ 22 հանդիպում, յուրաքանչյուր հանդիպմանը՝ 30 մասնակից՝ 16- 35 տարեկան)։
• Ձեռնարկի վերջնական փաթեթի ներկայացում (հայերեն լեզվով, էլեկտրոնային տարբերակով, որը կներառի նաև ուսուցանման համար ռուսերեն/անգլերեն հավելյալ նյութեր և հղումներ)։

 

2. ԺԱՄԱՆԱԿԱՑՈՒՅՑ/ՀԱՇՎԵՏՎՈՒԹՅՈՒՆ

I․ Պայմանագրի կնքման օրվանից 10-րդ օր․ նախնական հաշվետվություն՝ Ժամանակացույց, աշխատանքային պլան, շահառուների, գործընկերների ցանկ։

II․ Պայմանագրի կնքման օրվանից 2-րդ ամիս․ հաշվետվություն իրականացված աշխատանքային հանդիպումների վերաբերյալ (ՀՀ մարզերում և Երևանում): Ձեռնարկի նախնական բովանդակության ներկայացում և քննարկում «STRIVE»-ի աշխատանքային թիմի հետ։

III․ Պայմանագրի կնքման օրվանից 3-րդ ամիս․ մշակված ձեռնարկի ներկայացում, ՔՀԿ-ների հետ աշխատանքային հանդիպումների մասին հաշվետվության ներկայացում։

IV․ Պայմանագրի կնքման օրվանից 4-րդ ամիս․ ձեռնարկի վերջնական փաթեթի հանձնում, տեղեկատվական հանդիպումների մասին հաշվետվություն։

 

3. ՊԱՀԱՆՋՆԵՐ

3.1. Պահանջվող որակավորումներ և հմտություններ

• Բարձրագույն կրթություն,
• Հետազոտություններ իրականացնելու և ձեռնարկներ մշակելու փորձ,
• Ոչ ֆորմալ կրթության ոլորտում աշխատանքային/ուսուցանման փորձ,
• Միջազգային ծրագրերում աշխատելու փորձ,
• Աշխատանքային հանդիպումներ պլանավորելու, իրականացնելու փորձ,
• ՔՀԿ-ների, կամավոր աշխատանքի մասին տեղեկացվածություն,
• Հայերեն լեզվի գերազանց իմացություն,
• Գրելու, վերլուծելու և հաղորդակցման գերազանց հմտություններ,
• Անհատական և թիմի կազմում աշխատելու կարողություն,
• Անգլերեն լեզվի իմացությունը ցանկալի է։

3.2. Դիմելու համար պահանջվող փաստաթղթեր

• Ինքնակենսագրական (CV),
• Նախկինում կատարված նմանատիպ աշխատանքների օրինակների ներկայացում էլեկտրոնային տարբերակով, առկայության դեպքում` հղումներով,
• Նախատեսված աշխատանքի մշակման գործողությունների հակիրճ նկարագիր՝ ներառյալ բյուջե և ժամանակացույց,
• 1-2 երաշխավորների կոնտակտներ (ներառյալ նախորդ գործատուինը):

 

Հայտադիմումներն ուղարկելու համար սեղմեք այստեղ։

Կապ կհաստատվի միայն ընտրված թեկնածուների հետ։

 

 

17 Հունիսի 2024, Երկուշաբթի | 1330