Ծառայություն մատուցողը՝ Կրթության ոլորտի փորձագետ կամ փորձագիտական թիմ

Աշխատանքի բնույթը՝ Քաղաքացիական հասարակության դերի վերաբերյալ ուսումնական ծրագրի և մոդուլների մշակում՝ ԲՈՒՀ-երի ուսումնական ծրագրերում ներառելու նպատակով

Վայրը՝ ՀՀ մարզեր, Երևան

Ծրագիրը՝ «ՁԳՏՈՒՄ ավելի լավ ապագայի. համայնքների և քաղաքացիական հասարակության դիմակայունություն Հայաստանում»

Հաշվետու է՝ STRIVE ծրագրի ղեկավարին

Աշխատանքների իրականացման տևողություն՝ 4 ամիս, ակնկալվող սկիզբ՝ 2024թ. մարտ (ենթակա է պլանավորման փորձագետի հետ համատեղ)

Դիմելու վերջնաժամկետ՝ 2024թ. փետրվարի 12

Հետաքրքրվողները կարող են դիմել հնարավորինս շուտ։ Հայտերը կվերանայվեն ընթացիկ, ՆԵՖ-ը իրավունք է վերապահում անցկացնել հարցազրույցներ՝ մինչև նշված վերջնաժամկետի ավարտը և համապատասխան փորձեգետ կամ փորձագիտական թիմ գտնելու պարագայում կարող է փակել հայտարարությունը սահմանված վերջնաժամկետից ավելի շուտ։

1. ԱՌԱՋԱԴՐԱՆՔԻ ՀԻՄՆԱԿԱՆ ՆՊԱՏԱԿԸ

       1.1.    Ծրագրի ընդհանուր նկարագիրը

ՁԳՏՈՒՄ ավելի լավ ապագայի. համայնքների և քաղաքացիական հասարակության դիմակայունություն Հայաստանում (STRIVE) ծրագիրը նպատակ ունի բարելավել Հայաստանի քաղաքացիական հասարակության կազմակերպությունների (ՔՀԿ-ների) դիմակայունությունը, հաշվետվողականությունը և նորարարության կարողությունները: Ծրագիրն իր մեջ ներառում է տարբեր բաղադրիչներ, ինչպիսիք են ՔՀԿ-երի կազմակերպական կարողությունների բարելավում, նպատակային ֆինանսական աջակցություն, ոչ ֆորմալ խմբերի կողմից քաղաքացիական ինովացիոն ծրագրերի իրականացում, ՔՀԿ-ների միջև ցանցերի և համագործակցության ուժեղացում, կամավորության խթանում:

Երկարաժամկետ հեռանկարում Քաղաքացիական հասարակության կայունությունը և ՔՀԿ-ների վերաբերյալ հասարակության տեղեկացվածության մակարդակը բարձրացնելու նպատակով նախատեսվում է համագործակցել բարձրագույն ուսումնական հաստատությունների հետ՝ մշակելու ու ներդնելու ուսումնական ծրագիր տարբերակված մոդուլներով, որը հնարավորություն կտա հնարավորինս մեծ թվով ուսանողների ուսուցանել ՔՀԿ-ների դերի կարևորության մասին։

Ծրագրի այս բաղադրիչի շրջանակներում պլանավորվում է կատարել հետազոտություն և մշակել ուսումնական ծրագիր և մոդուլ, որն իր մեջ կներառի (բայց չի սահմանափակի) հետևյալ բաժինները`

• Քաղաքացիական հասարակության դերը, առանցքային և բազմազանեցված դերերը 
• ՔՀԿ-ների որդեգրած գործառնական և ծրագրային մոդելները 
• Քաղաքացիական հասարակության ձևավորման պատմությունն ու կարևորությունը,
• ՔՀԿ-ների ազդեցությունը ՀՀ սոցիալ-տնտեսական արդյունքների վրա։

Հետազոտության արդյունքում մշակված ուսումնական ծրագիրը և մոդուլը կարող է հավատարմագրվել որպես առանձին կամ ոչ պարտադիր առարկա՝ կախված յուրաքանչյուր բարձրագույն ուսումնական հաստատության ներքին կրթական համատեքստից և կարիքներից: Դասընթացն ավարտելու և ուսումնական հաստատության գործող կարգին համապատասխան կրեդիտներ ստանալու համար (եթե անհրաժեշտ է) ուսանողներից կարող է պահանջվել իրականացնել և վավերացնել կարճատև պրակտիկա որևէ տեղական ՔՀԿ-ում կամ մշակել համայնքային նախաձեռնություն՝ համագործակցելով տեղական ՔՀԿ-ի հետ:

Նշված ծրագիրը և մոդուլները մեկ տարվա ընթացքում կփորձարկվեն 3 համալսարաններում։ Նախատեսվում է, որ մինչև ծրագրի ավարտը այն հաստատված կլինի առնվազն 5 համալսարաններում։

       1.2 Աշխատանքի ընդհանուր նկարագիրը

• ՀՀ կրթության, գիտության, մշակույթի և սպորտի նախարարության և ՀՀ աշխատանքի և սոցիալական հարցերի նախարարության հետ համագործակցելով՝ հատկորոշել ուսումնական ծրագրի համար առաջնահերթություն համարվող թեմաները, ուսումնական մոդուլների ձևաչափը, համալսարաններում դրանց ներդրման հնարավոր ուղիները, մեթոդոլոգիան և այլն։  Ակնկալվող թեմաները կարող են լինել՝ 

- Քաղաքացիական հասարակության պատմությունը, համակարգը, կառուցվածքը, կազմակերպությունները
- Քաղաքացիական հասարակության կարևորությունը և քաղաքական որոշումների կայացման վրա ունեցած դերը
- Քաղաքացիական հասարակության և պետության միջև գործընկերության և երկխոսության տեսակները, շրջափուլերը
- Քաղաքացիական մասնակցության մատրիցան, մակարդակներն ու աստիճանները։
- ՔՀԿ-ների ֆինանսական կայունությունը, սոցիալական ձեռնարկատիրություն
- Կամավորություն
- Եվ այլն։

• Աջակցել STRIVE ծրագրի և համալսարանների միջև համագործակցության հուշագրերի կնքման գործընթացին
• Նախապես սահմանված և պլանավորված ժամկետներում իրականացնել աշխատանքային հանդիպումներ ՀՀ մարզերում և Երևանում, որոնց մասնակից կլինեն դասախոսներ, փորձագետներ, ՔՀԿ ոլորտի ներկայացուցիչներ և այլ շահագրգիռ կողմեր (միջինը՝ 15 մասնակից, որոնց ցանկը նախապես կհամաձայնեցվի ծրագրի թիմի հետ) 
• Անցկացված աշխատանքային հանդիպումների արդյունքների հիման վրա մշակել բարձրագույն ուսումնական հաստատության համար սահմանված կրթական չափորոշիչներին համապատասխան ուսումնական ծրագիր և մոդուլներ, դասավանդման մեթոդիկա։
• Անել առաջարկներ օպտիմալ կիրառման վերաբերյալ (օրինակ՝ դասաժամերի ընթացքում և/կամ առցանց, ինքնուրույն կամ համատեղ և այլն) 
• Անել առաջարկներ թիրախ լսարանի վերաբերյալ (օրինակ՝ սոցիալական գիտություններ ուսումնասիրող ուսանողներ և/կամ բոլոր նրանք, ովքեր ցանկություն ունեն լրացնելու ուսումնական ծրագիրը տվյալ դասընթացով)
• Անել առաջարկներ իրականացվելիության վերաբերյալ (ֆորմալ հավատարմագրում և/կամ հավաստագրով շարունակական կրթություն և մասնագիտական զարգացում)   
• Անցկացնել ուսումնական ծրագրի և մոդուլների կիրառման մեթոդների վերապատրաստման դասընթացներ՝ ԲՈՒՀ-երի համապատասխան բաժինների դասախոսների համար
• Կազմակերպել ուսումնական մոդուլների փորձարկում վերապատրաստված անձանց կողմից (յուրաքանչյուր դասընթացին 15 երիտասարդ/ուսանողի մասնակցությամբ)
• Գնահատել նոր ուսումնական ծրագրի կիրառման հետ կապված հնարավոր ռիսկերը և նախանշել դրանց կառավարման ուղիները  
• Աջակցել փորձարկված ուսումնական ծրագրի, մոդուլների ներդրմանը՝ համալսարանների հանրային կառավարման, քաղաքական և հումանիտար գիտությունների ֆակուլտետներում
• Պատրաստել վերջնական ուսումնական փաթեթ՝ ներառյալ՝ ուսումնական նյութ, թեմատիկ պլան, դասավանդման մեթոդիկա և գործնական մոդուլ (հայերեն լեզվով, էլեկտրոնային տարբերակով, որը կներառի նաև դասավանդման համար ռուսերեն/անգլերեն հավելյալ նյութեր և հղումներ)։

        2.    ԺԱՄԱՆԱԿԱՑՈՒՅՑ/ՀԱՇՎԵՏՎՈՒԹՅՈՒՆ

        Հաշվետվություն I

Ներկայացման ժամկետ՝ պայմանագրի կնքման օրվանից 7-րդ օր (վճարում՝ պայմանագրի ընդհանուր գումարի 10%)

Բովանդակություն՝ նախնական հաշվետվություն, ներառյալ՝ ժամանակացույց, աշխատանքային պլան, շահառուների, գործընկերների ցանկ։

        Հաշվետվություն II

Ներկայացման ժամկետ՝ պայմանագրի կնքման օրվանից 67-րդ օր (վճարում՝ պայմանագրի ընդհանուր գումարի 25%)

Բովանդակություն՝

• Հետազոտության համար անցկացված աշխատանքային հանդիպումների մասին հաշվետվություն, 
• Ուսումնական ծրագրի, մոդուլների նախնական տարբերակ

       Հաշվետվություն III

Ներկայացման ժամկետ՝ պայմանագրի կնքման օրվանից 97-րդ օր (վճարում՝ պայմանագրի ընդհանուր գումարի 25%)

Բովանդակություն՝ 

• Ուսումնական ծրագրի, մոդուլների կիրառման մեթոդների կազմում և վերապատրաստումների իրականացում ԲՈՒՀ-երում։
• Փորձագետի վերահսկմամբ ուսումնական մոդուլների փորձարկում վերապատրաստված անձանց կողմից։

       Հաշվետվություն IV

Ներկայացման ժամկետ՝  Պայմանագրի կնքման օրվանից 120-րդ օր (վճարել պայմանագրի ընդհանուր գումարի 40%)։

Բովանդակություն՝

Հետազոտության և փորձարկումների հիման վրա ուսումնական ծրագրի, մոդուլների վերջնական փաթեթի հանձնում։

*Ուսումնական ծրագրի մշակման, փորձարկման և ներդրման համար կվճարվի յուրաքանչյուր փուլի հաշվետվության հանձնման ընդունման ակտը ստորագրելուց հետո՝ 5 աշխատանքային օրվա ընթացքում։

       3. ՊԱՀԱՆՋՆԵՐ

       3.1 Պահանջվող որակավորումները և հմտությունները

• Հանրային կառավարման, քաղաքական և հումանիտար գիտությունների  թեկնածուի գիտական աստիճան 
• Աշխատանքային/դասավանդման փորձ համապատասխան ոլորտում (առնվազն 5 տարվա)
• Բարձրագույն և հետբուհական մասնագիտական կրթական չափորոշիչների լավ իմացություն, մոդուլային ծրագրեր կազմելու/վերանայելու փորձ
• Կրթական մոդուլների մշակման փորձ
• Միջազգային ծրագրերում աշխատելու փորձ
• Աշխատանքային հանդիպումներ պլանավորելու, իրականացնելու փորձ
• Պետական կառույցների և ԲՈՒՀ-ների հետ աշխատելու փորձ
• Հայերեն լեզվի գերազանց իմացություն
• Վարժ գրելու հմտություններ 
• Վերլուծելու հմտություններ
• Հաղորդակցման հմտություններ 
• Անհատական և թիմում աշխատելու կարողություն
• Անգլերեն լեզվի իմացությունը ցանկալի է։

       3.2 Դիմելու համար պահանջվող փաստաթղթեր 

Ինքնակենսագրական (CV)՝ հնարավորինս բացված ձևաչափով (Օր․ Europass CV)

• Նախկինում կատարված նմանատիպ աշխատանքների օրինակներ՝ էլեկտրոնային տարբերակով, առկայության դեպքում հղումներով։
• Ուսումնական ծրագրի մշակման գործողությունների հակիրճ նկարագիրը՝ ներառյալ բյուջեն և ժամանակացույցը։
• 2 երաշխավորների կոնտակտներ (ներառյալ նախորդ գործատուին)։ 

Ֆինանսական առաջարկը պետք է ներառի բոլոր տեսակի ծախսերը։

Փորձագետները և փորձագիտական խմբերը, որոնք կարող են իրականացնել նշված բոլոր գործողությունները, կարող են դիմել։

Կապ կհաստատվի միայն ընտրված թեկնածուների հետ։

Խրախուսվում է թեկնածուի կողմից Նիյր իսթ ֆաունդեյշնի և վերջինիս գործունեության մասին ծանոթացումը՝ www.neareast.org կայքի միջոցով։

23 Հունվարի 2024, Երեքշաբթի | 576